Khandian (بیسن کی کھنڈیاں)

بیسن کی کھنڈویاں

معزز اور محترم قارئین،

بیسن کی کھنڈیاں یا کھنڈویاں  گجراتی ڈش ہے اور  پاکستان اور ہندوستان میں یکساں مقبول ہے۔  گرمیوں میں یہ عام طور پر زیادہ بنائی جاتی ہیں۔ پاکستان میں زیادہ تر لوگ جو ہندوستان سے ہجرت کر کے یہاں آئے یہ ڈش بناتے ہیں مگر مقامی آبادی کے لوگوں کو اسکا ذائقہ تو بہت  پسند ہوتا ہے مگر وہ اسکو بنا نہیں پاتے۔ خاص طور پر جنوبی پنجاب میں اس ڈش کو بہت پسند کیا جاتا ہے مگر مقامی آبادی کو بنانے میں مشکل ہوتی ہے تو وہ بہتر خیال کرتے ہیں کہ اپنے اردو بولنے والے دوستوں سے فرمائش پر بنوالیں۔  اس طرح  کی اور بھی بہت سی ڈشز ہیں جیسے اروی کے پتوں کے کباب اور انکا سالن اور بیسن کی کڑھی اور دال کی مونگچیاں جنکو دال کے کوفتے بھی کہتے ہیں۔ ہم وہ سب ڈشز آپکو بنانا سکھائیں گے  ۔ مگر سیکھنے کے بعد  آُ پ  اپنے پاکستانی بہن بھائیوں کے ساتھ اخوت اور محبت کا وہی  سلسلہ قائم رکھیں گے جو پہلے تھا۔  آپ انکو بنانے کے بعد آپ  اپنے ان دوستوں کو کھلائیں گے تو وہ بھی حیران رہ جائیں گے کہ یہ آپ نے کیسے سیکھ لی۔ توپیارے دوستو اب کھنڈیاں بنانا راز نہیں رہا۔ کیونکہ ہم آُ پ سے بانٹنے والے ہیں کھنڈیاں بنانے کا  راز۔

انکے بنانے کا طریقہ بہت ہی  آسان ہے

چلیں شروع کرتے ہیں ۔

اسکے لئے آپکو درکار ہیں۔

بیسن ۔۔۔۔۔۔۔۔۔۔۔۔۔۔۔۔۔۔۔۔۔ آدھا کلو

نمک۔۔۔۔۔۔۔۔۔۔۔۔۔۔۔۔۔۔  حسب ذائقہ

مرچ۔۔۔۔۔۔۔۔۔۔۔۔۔۔۔۔۔۔ حسب ذائقہ

سوکھا پسا ہوا دھنیا۔۔۔۔۔۔۔۔۔۔۔۔۔۔ آدھا چمچ

سوکھی  قصوری  میتھی۔۔۔۔۔۔۔۔ایک چائے کا چمچ

پانی ۔۔۔۔۔۔۔۔۔۔۔۔۔۔۔۔۔۔۔۔۔۔ تھوڑا سا

مصالحہ بنانے کے لئے

گھی یا تیل ۔۔۔۔۔۔۔۔۔۔۔۔۔۔۔۔۔۔ایک کپ

نمک۔۔۔۔۔۔۔۔۔۔۔۔۔۔۔۔۔۔  حسب ذائقہ

مرچ۔۔۔۔۔۔۔۔۔۔۔۔۔۔۔۔۔۔ حسب ذائقہ

سوکھی  قصوری  میتھی۔۔۔۔۔۔دو کھانے کے چمچ

پیاز ۔۔۔۔۔۔۔۔۔۔۔۔۔۔۔۔ تین بڑے

لہسن ادرک پیسٹ ۔۔۔۔۔۔۔ ایک کھانے کا چمچ

ترکیب

کھنڈیاں بنانے کے لئے

بیسن کو ایک دیگچی میں ڈال کر خوشبو آنے تک اتنا بھونیں کہ اسکا کچا پن ختم ہوجائے ۔ جیسے بیسن کا حلوہ بناتے وقت بھونتے ہیں۔

پھر اسے ایک الگ برتن میں نکال کر دیگچی میں  تقریبا دو سے تین  کپ پانی ڈالیں ۔ کوشش کریں کہ پہلے دو کپ پانی ڈال لیں کیونکہ کم چیز بعد میں ز یادہ ہو سکتی ہے ۔ ذیادہ چیز کا کم ہونا بہت مشکل ہے۔

پھر اس پانی میں نمک، مرچ، سوکھی میتھی جسے ڈالنے سے پہلے ہاتھ سے مسل لیں۔ ڈال دیں

ابال آنے پر اس میں بھُنا ہوا بیسن ڈال کر پکائیں۔ اتنا پکائیں کہ تصویر میں نظر  آنے والے بیسن کی طرح سخت پیڑا سا بن جائے۔۔ اگر پانی کم لگے تو تھوڑا سا شامل کر لیں۔ اگر ذیادہ ہوجائے تو بیسن کو تب تک پکائیں جب تک سخت نہ ہوجائے۔

پھر اس بیسن کو نکال کر ایک ٹرے میں پھیلا لیں۔ گیلے ہاتھ کی مدد سے تھپتھپاتی جائیں  تاکہ کھنڈیاں یک جان اور خوبصورت بنیں۔

انگوٹھے کی مدد سے کنارے بھی خوبصورت بنا لیں۔ اور اسے جمنے کے لئے کھلی ہوا میں کمرے کے درجہ حرارت پر آدھے گھنٹے کے لئے چھوڑ دیں۔

آدھے گھنٹے بعد چھُری کی مدد سے انہیں  اپنی پسند کی شکل میں یعنی چوکور یا لمبی کاٹ لیں۔

کھنڈیوں کو رُخ بدل کر دوسری طرف سے بھی ہوا لگنے دیں کیونکہ دوسری طرف سے ان میں کچھ نمی باقی ہوگی۔

کچھ لوگ کھنڈیاں ایسے ہی کھانا پسند کرتے ہیں جبکہ کچھ لوگ اسکو مصالحے میں ڈال کر سالن بنا کر روٹی سے کھانا پسند کرتے ہیں۔

مصالحہ بنانے کے لئے

مصالحہ بنانے کے لئے  پیاز کو  کاٹ کر ابال لیں۔ جن لوگوں کو لہسن کی بو پسند نہیں وہ لہسن پیازوں کے ساتھ ہی ابال سکتے ہیں۔

پانی پھینک کر پیاز اور لہسن چھلنی کی مدد سے نتھار لیں۔ اور پھر  اسے بلینڈر میں تھوڑے سے صاف پانی کے ساتھ  ڈال دیں۔

بلینڈر میں ادرک  الگ سے ڈالیں۔

اگر لہسن کی کچی بو پسند ہے تو ادرک لہسن الگ سے ڈالنے کی ضرورت نہیں۔ ایسے ہی پیسٹ پیازوں میں شامل کر  دیں۔

اب اس میں  مرچ، نمک، سوکھا دھنیا شامل کر کے پیس لیں۔

اسے دیگچی میں ڈال کر پکائیں۔

جب پانی خشک ہونے لگے تو اس میں ایک کپ تیل یا گھی شامل کر کے بھونیں۔

بھُنائی کے وقت  ہری مرچیں بھی شامل کر سکتے ہیں۔

جب مصالحہ  دیگچی  کے پیندے میں لگنے لگے  اور تیل چھوڑنے لگے تب سوکھی ہوئی میتھی مسل کر شامل کر دیں اور تھوڑا سا گرم مصالحہ بھی شامل کر دیں۔

اب اگر آُکو شوربہ زیادہ پسند ہے تو اسکی مناسبت سے پانی ڈالیں۔

اگر شوربہ کم پسند ہے تو کم پانی ڈالیں۔

اور شوربے کو پکنے دیں۔

جب شوربے میں ابال آجائے تو  اس میں کھنڈیاں شامل کر دیں اور ہلکی آنچ پر  پانچ منٹ پکائیں۔

پانچ منٹ بعد چولہا بند کر دیں اور    کھنڈیوں کا سالن پیالے میں نکال کر اوپر فرم مصالحہ اور ہرا دھنیا چھڑک کر روٹی یا نان کے ساتھ تناول فرمائیں۔

گجراتی کھانڈوی

بیسن ۔۔۔۔۔۔۔۔۔۔۔۔۔۔۔۔۔۔۔۔۔ آدھا کلو

نمک۔۔۔۔۔۔۔۔۔۔۔۔۔۔۔۔۔۔  حسب ذائقہ

مرچ۔۔۔۔۔۔۔۔۔۔۔۔۔۔۔۔۔۔ حسب ذائقہ

سوکھا پسا ہوا دھنیا۔۔۔۔۔۔۔۔۔۔۔۔۔۔ آدھا چمچ

سوکھی  قصوری  میتھی۔۔۔۔۔۔۔۔ایک چائے کا چمچ

پانی ۔۔۔۔۔۔۔۔۔۔۔۔۔۔۔۔۔۔۔۔۔۔ تھوڑا سا

دہی ۔۔۔۔۔۔۔۔۔۔۔۔۔۔۔۔۔۔۔۔۔ ایک پاوُ

ہرا پیاز۔۔۔۔۔۔۔۔۔۔۔۔۔۔۔۔۔۔  ایک عدد

سبز دھنیا۔۔۔۔۔۔۔۔۔۔۔۔۔۔۔۔۔۔ تھوڑا سا

پانی ۔۔۔۔۔۔۔۔۔۔۔۔۔۔۔۔۔۔۔۔۔۔ تھوڑا سا

ترکیب

ایک پیالے میں بیسن لہسن ہری مرچ  نمک مرچ   وغیرہ  ڈال کر مکس کر لیں پھر اس میں گاڑھی سی لسی بنا کر ڈال دیں  اور ایک چائے کا چمچ تیل ڈال کر پکائیں۔ جب گاڑھا ہو جائے اور پیسٹ بن جائے  تو کسی ٹری کی الٹی طرف تیل لگا کر اس پیسٹ کی باریک سی تہہ لگا دیں۔ جب سوکھ جائے تو چھری سے لمبے لمبے ٹکڑے کاٹ کر انکے رول بنا لیں۔

رول کتنے چوڑے اور بڑے بنانے ہیں یہ آپ پر منحصر ہے۔ اپنی پسند کو مد نظر رکھ کر بنا لیں۔ اگر سنیکس کے طور پر پیش کرنا چاہتے ہیں اور چائے کے ساتھ کھانا چاہتے ہیں تو بہتر ہوگا زیادہ چوڑے نہ بنائیں ایک سے دو انچ کی چاڑائی کافی رہے گی۔

پھر ان کو ٹرے میں رکھ کر ان پر گھی اور باریک کترے ہوئے ہرے پیاز اور  دھنیے کا تڑکا لگا لیں۔ گرم مصالحہ ڈال کر پیش کریں۔